Uçan Naməlum Obyektlər Yer kürəsini nəzarətə götürüb
Onların poliqonu Xəzər dənizində yerləşir Uçan Naməlum Obyektlər
(UNO) mütəmadi olaraq insanların diqqətini özlərinə çəkirlər. Kimisi
onlara reallıq, kimisi də qarabasma kimi baxır. UNO və gəlmələr barədə
müxtəlif fərziyyələr olsa da, bu sahəni elmi cəhətdən öyrənənlər də var.
Müsahibimiz Azərbaycan Milli Aerokosmik Tədqiqatlar İnstitutunun
əməkdaşı, ufoloq Fuad Qasımovdur.
- Son vaxtlar, təbii
fəlakətlərin baş verdiyi ərazilərdə tez-tez UNO-lar müşahidə olunur.
- Bu təsadüf deyil. Belə ki, son dövrlərdə baş verən təbii fəlakətlər
əslində süni şəkildə yaradılır. Bu isə Yer kürəsində qarşısıalınmaz
fəsadlara səbəb ola bilər. UNO-lar bizi bu fəsadlardan qorumağa
çalışırlar. Təbii fəlakətləri süni şəkildə biz də yarada bilirik, amma
onların qarşısını almaq qeyri-mümkündür. Elə Qəbələ RLS özü də bir növ
geofizik silahdır. Onun ionosferdə yaratdığı plazmoidləri müəyyən yerə
yönəltdikdə həmin ərazidə təbii fəlakətlər yaratmaq olar. İndi sifarişlə
tufan da, zəlzələ də yaratmaq mümkündür. Süni fəlakətlərlə təbii
fəlakətlərin fərqini yalnız xüsusi cihazlar müəyyən edə bilər. 1988-ci
ildə Spitakda baş vermiş zəlzələ özü də süni mənşəli idi. Bu zəlzələ
SSRİ vaxtında ilk tektonik silahı sınaqdan keçirmək üçün aparılan
eksperimentin nəticəsi idi. Zəlzələ Alyaskadan yerin 10 min km-lərlə
uzunluğu olan dalğaötürən çatlarına təsir etməklə yaradılmışdı. Həmin
çatların müəyyən yerlərində nüvə partlayışı edirlər. Bunun nəticəsində
güclü enerji o biri başda olan zəlzələ ocaqlarını oyadır. Mənim bu
barədə "Yer kürəsi qəza vəziyyətində. 21-ci əsrdə bəşəriyyəti nə
gözləyir. Dəhşətli tektonik silahın konturları" kitabım da çıxmışdı. Onu
hər yerə - ABŞ prezidentinə, BMT-yə. NATO-ya, NASA-ya göndərdik. Bill
Klinton şəxsən Heydər Əliyevə zəng edərək bildirmişdi ki, mən
Azərbaycanda belə yüksək səviyyəli mütəxəssislərin olduğunu bilmirdim.
Onlar bizim mütəxəssisləri çox-çox qabaqlayıb. Bundan panikaya düşən
amerikalılar NATO-nun Avstraliya yaxınlığında Morua adasındakı
poliqonunda təcili eksperiment aparmağa başladılar. 5 mini atom
partlayışı həyata keçirildi. 6-cı partlayışa hazırlıq aparılarkən nəhəng
bir adam əlində böyük bir ekranla gələrək onlara bu partlayışın
nəticələrini göstərdi və ABŞ 6-cı partlayışdan vaz keçdi. Sən demə, bu
partlayış yer kürəsinin maqnit qüvvə xətlərinə təsir göstərəcəkmiş.
Quşlar onların əsasında oriyentasiyanı tuturlar. Bu xətlər Misir
ehramlarından da keçir. Onların yerindən tərpənməsi Yer kürəsinin
tarazlığını poza bilər. Nəticədə, böyük bir ərazidə əhali qırıla, ya da
dəli ola bilər. Artıq belə partlayışlara ehtiyac yoxdur. Elə RLS
vasitəsi ilə nə istəsən, etmək olar. Hətta iqlimi də dəyişmək olar.
RLS-in yaratdığı müəyyən tezlikli dalğalar Yer kürəsində böyük
təhlükələr yarada bilər.
- Deməli, Qəbələ RLS üstündə dava
buna görə gedir? - Əlbəttə. RLS raketərə nəzarət üçün olsa da,
böyük ərazilərə təsir imkanına malikdir. ABŞ üçün əsas təhlükə Rusiya,
Rusiya üçün ABŞ-dır. Buna görə də hər iki ölkə RLS-ə sahib çıxmaq
istəyir. Onun vasitəsi ilə bütün Şərq ölkələrini, hətta Hind okeanını
görmək olar. Bu RLS tam gücü ilə işləsə, 500 km-ə nəzarət etmək olar.
Onu modernləşdirməklə radiusunu 3-4 dəfə artırmaq olar. Onda Qafqazı,
İranı, demək olar ki, bütün Şərqi nəzarətdə saxlamaq mümkündür. RLS
təbii fəlakətdən əlavə, psixotrop silah kimi fəaliyyət göstərə bilər. 7
hers tezlikli dalğa beynin alfa ritmlərinə təsir edir, bundan insan dəli
ola, ya da ölə bilər. Bu kimi dalğalar insanın genlərinə də təsir
etdiyi üçün Qəbələdə uşaq ölümü, anormal uşaqların doğuşu çox olur.
- Piramidaların gəlmələrin vasitəsi ilə tikildiyi barədə də fərziyyələr
var... - Eramızdan əvvəl yaradılan bu kimi meqalitlər sadəcə
insan əli ilə düzəldilə bilməzdi. İnsanlara gəlmələr kömək edib, özü də
müəyyən məqsədlə. Məsələn, piramidaların forması elədir ki, onlar kosmik
enerjini toplayır və Yer kürəsi ilə kosmos arasında əlaqə yarada
bilirlər. Biz hələ də bunu tam dərk edə bilmirik. Vaxtilə
radioteleskoplar, RLS-lər vasitəsilə kosmosa siqnal göndərirdilər. Bu
dalğaların necə zərərli olmasını bilmirdilər. Piramidalar isə zərərsiz
işləyir.
- UNO-ların Yer kürəsinə gəlişində başqa məqsədlər də
var? - UNO-lar müxtəlif ərazilərdə tarlalara müəyyən işarələr -
piktoqramlar həkk ediblər. Amma alimlər hələ ki, onların mənasını aça
bilmirlər. Onu da deyim ki, UNO-lar müxtəlif sivilizasiyalardan
gəldikləri üçün məqsədləri də müxtəlifdir. Onların əsas məqsədi Yer
kürəsini bizim özümüzdən qorumaqdır. Biz burada elə mühit yaratmışıq ki,
ekoloji problemlər nəinki bizə, hətta kosmosa da təsir edir. Soruşula
bilər - Yer kürəsi Kainat miqyasında nöqtə kimi zərrəcikdirsə, onun
varlığı və ya yoxluğu Kosmos üçün nə əhəmiyyət daşıya bilər? Məsələ
burasındadır ki, Yerdə yaranan neqativ enerji son nəticədə kainatı belə
dağıda bilər. Buna görə də gəlmələr bizi ağıllandırmağa çalışırlar.
Bəzən UNO-lar bu məqsədlə insanları oğurlayıb bədənlərinə implantant
yerləşdirirlər ki, bizi hər yerdə izləsinlər. Hələ 1977-ci ildə
gəlmələr qarşımıza ekoloji tarazlığa riayət etmək barədə şərtlər
qoyublar. Bu şərtlərə tam riayət etsək, onlar öz super texnologiyalarını
bizimlə bölüşəcəklər. Əks halda, Yer kürəsi bizi məhv etmək istəyən
sivilizasiyaların öhdəsinə buraxılacaq.
- UNO
supertexnologiyaya malikdirsə, qəzaya necə uğrayır? - UNO-ların
qəzaya düşməsinə səbəb digər UNO-lardır. Sivilizasiyalar arasında da
münaqişə gedir. Əlbəttə ki, bu sivilizasiyalardan biri də o birindən
üstündür. İqtidarca Allaha yaxın sivilizasiyalar var.
- Bəzi
UNO-ların başqa qalaktika və planetlərdən deyil, Yerin təkindən
gəldiyini də deyənlər var. - UNO-lar üçün nə məsafə, nə də məkan
problem deyil. Onlar molekulyar deyil, lepton, yəni ruh materiyadan
təşkil olunduğu üçün, Yer kürəsinin altında da mövcud ola bilərlər.
Azərbaycan ərazisində UNO daha çox Şamaxı, Daşkəsən, Lənkəran, xüsusilə
də Bakı ərazisində müşahidə olunur, çünki onların bazaları Xəzərin
Pirşağı və Nardaran arasında yerləşən hissəsində yerləşir. Gəlmələr
zamanı əyə bilirlər. Buna görə də uzaq məsafədən gələ bilirlər. Biz bunu
hələ başa düşmürük. Zaman da məkan kimi hissəcikdir - kvantdır. Bizim
dünyada zaman bir istiqamətdə gedir. Kosmosda isə belə deyil. Keçmiş,
indiki və gələcək zamanlar paralel olaraq mövcuddur. Bir zamandan
digərinə adlamaq mümkündür.
- UNO-lar açıq şəkildə üzə niyə
çıxmır? - İnsan qarışqa ilə danışa bilir? Biz də onlar üçün
qarışqayıq. Onlar istəyəndə bizimlə telepatik dildə və ya öz dilimizdə
də danışırlar. Kənardan elə görünür ki, onlar bizim həyatımıza müdaxilə
etmirlər. Əslində isə bizi idarə edirlər və onlar daima
yaxınlığımızdadırlar, sadəcə, gözə görünmürlər. Nepalda Himalay
dağlarında onların sivilizasiyasının baş qərargahı var. Son vaxtlar
UNO-ların çoxalması Yer kürəsində ekoloji vəziyyətin olduqca
pisləşməsindən xəbər verir.
- Ufologiya Allahı inkar etmirmi?
- Dünyada tənha olmağımızı özümüz hesab edirik. Amma dünyanın
ucu-bucağı yoxdur. Hər qalaktikada 100 milyard ulduz var. Qalaktikalar
özü isə 100 milyondur. Buna görə də həyatın yalnız bizim planetdə olması
qeyri-mümkündür. Bugünkü elm artıq Allahı inkar edə bilmir. Çünki Yer
kürəsinin yaranmasını elmi cəhətdən izah etmək qeyri-mümkündür.
Məhəmməd peyğəmbər özü də UNO-ların dəfələrlə şahidi olub. Bu, 3-cü göz
vasitəsi ilə mümkündür. Stresdə, qəzada 3-cü göz açıla bilər. Onda insan
bilmədiyi elmlərə yiyələnir. Bizdən öncəki sivilizasiyanın sakinləri
elmə bu yolla yiyələnirdilər.
- İşlərinizə dəstək verən
varmı? - Bizdə bu işlərə hələ də inamsızlıqla, lağla yanaşırlar.
Sovet dövründə isə elə qadağa qoyulmuşdu ki, ondan danışanı dəlixanaya
salırdılar. Eynşteynə görə, heç bir maddi cisim işıq sürətini keçə
bilməz. Bəs, UNO necə keçir? Deməli, yeni təfəkkür yaratmalıyıq, bunun
üçün də ənənəvi elmdən daha qabağa getməliyik. Biz elmi araşdırmaları öz
təşəbbüsümüzlə aparırıq. Amma eksperimentlər aparmaq üçün dövlət
maliyyə dəstəyi göstərməlidir. Bu işlə məşğul olan qurum yoxdur. Mən isə
təkəm. Bununla belə mənə maneçilik törədirlər. Sıxışdırıb məndən
məlumat almaq, bütün informasiyanı ələ keçirmək istəyənlər var.
Müəllif: Elşad
ÜMİD
|